15. A. 332. Teicēja 76 g. veca Īva Staleidzāne, Atašienes pagastā.

Kaids puika beja pījemts par gonu pi saiminīka, bet nabeja nūrunuots, cik moksuot par ganīšonu. Puika nūganīja vīnu vosoru un rudenī saiminīks prosa: "Ar kū tev moksuot par ganīšonu?"

Gons atbildēja: "Man cyta nikuo navajag, lai tikai saimnīca izvuorej bīzas putras reizei paēst!"

Saimnīca izvuorēja bīzū putru, īlyka blūdiņā, pīlyka kluot svīsta, lai ir gorduoka, un atdevja gonam. Gons aizguoja. It jis pa ceļu un sateik svātu Meikulu. Svātais Meikuls prosa: "Nu kurīnes tu ej?"

"Par vosoru ganīju lūpus pi saiminīka. Saiminīks man īdevja par ganīšonu bļūdiņu bīzas putras, tagad eju, un kad satikšu lobu cylvāku, tad apēssim tū putru abēji; bet jo nasatikšu, tad apēsšu vīns pats," atbildēja puika.

Svātais Meikuls soka: "Ēssim mēs obi, es esmu lobs cylvāks!"

"Kas tu esi?" prosa puika.

Es esmu svātais Meikuls," atbildēia Meikuls.

"Na, tu naesi lobs," soka puika, "cytam tu esi labs, cytam slykts, jo vīnam rudzi teirumā izaug lobi, ūtram slykti."

Tai jis guoja otkon tuoļuok. Īt jis un sateik kaidu vecīti. Vecīts jam prosa: "Kur tu ej, puisīt?"

"Nu gonim eju! Par vosoru ganīju pi saiminīkai lūpus, saiminīks par ganīšonu man īdevja bļūdiņu bīzas putras. Tagad eju un, jo satikšu lobu cylvāku, tad apēssim obi, bet jo nasatikšu, apēsšu vīns pats," atbildēja puika.

Vecīts soka: "Ēssim mēs obi, es esmu lobs cylvāks!" "Kas tu esi?" prosa puika.

"Es esmu pats Dīvs," atbildēja vecīts.

"Na, tu naesi lobs," soka puika, "tu cytam dūd lobu dzeivi, cytam slyktu!"

Īt puika tuoļuok un sateik kaidu sīvīti. Sīvīte prosa: "Kur tu ej, puisīt?"

"Es eju nu gonim," atbildēja puika.

"Kū tev devja par ganīšonu?" prosa sīvīte.

"Man īdevja bļūdiņu bīzas putras! Tagad es eju un, jo satikšu lobu cylvāku, tad apēssim obi; bet jo nasatikšu, tad apēsšu vīns pats," atbildēja puika.

"Ēssim mēs obi," soka sīvīte, "es esmu lobs cylvāks!" "Kas tu esi?" prosa puika.

"Es esmu Nuove," atbildēja puika.

"Jo tai, tad ēssim obi divi," soka puika, "tu esi lobs cylvāks, tu pajem i nabogu, i boguotu!"

Atsasāda puika ar Nuovi, apēdja bīzu putru un aizguoja katrs sovu ceļu.