4. A. 333. H. Šalkovska, Līksnas pag., J. Rupjā kr.

Dzeivova, dzeivova dēdeņš ar buobeņu. Jim beja dēleņš, jis ganēja mežā gūvs. Reizi ganēdams jis īs,avēra zemē lelu, lelu ūgu, puorsvīda tū par placu i atsaroda mozeņa meitineite. Tei meitine jam smagi patyka un jis pataisēja dēļ juos mežā mozu ustubeņu.

Atguoš da sātai, jis tī nīkuo nasacēja par ūgu-meitu, tik prasēja, lai jam dūd kotru dīnu divi kukuleiši maizys. Muote jam deva ūtrā dīnā divi kukuleiši maizys. Aizdzyna jis lūpus, daguoja da ūgas-meitines ustubeņai un sacēja:

"Ūga meita, ūga meita,

Attais' tu noma durs :

Atsadzan gūvu gons,

Atnas tev kukuleiti."

Ūga-meita attaisa durovys, pajem nū sava bruoleiša kukuleiti i otkon aizataisa. Vylks nūsaklausēja, kū bruoleits runova ar sovu muoseņu, nuokūšā dīnā atguoja da ustubeņai i sacēja rupā balsā :

"Ūga meita, ūga meita,

Attais' tu noma durs :

Atsadzan gūvu gans,

Atnas tev kukuleiti."

Ūga-meita nūsaklausēja i nalaida. Cytā reizē vylks aizguoja da kaļvam, pakola mēli, atguoja otkon da ūgas-meitas ustubeņai i sacēja smolkā bolsā:

"Ūga meita, ūga meita,

Attais' tu noma durs :

Atsadzan gīwu gons,

Atnas tev kukuleiti."

Nūsaklausējusīs ūga-meita īlaide vylku ustubeņā i vylks jū apēde. Ūtrā dīnā atguoja ūgas-meitas bruoleits ar kukuleiti, daduoja da ustubeņai i īsavēra, ka durovys beja vaļē. Jis smagi žālova sovys muoseņis i nū lelys badys daguoja da lozdys kryuma i pasakuora zeida dīgūs. Pa tū laiku sātā atskrēja kuce da tāvam ar muoti un kauce :

"Kav, kav tāva dāls,

Kav, kav pasakuora,

Kav, kav zeida dīgūs,

Kav, kav lozdys kryumā."

Jī padzyna tū kuci Tūreiz atguoja vērss i suoka mauruot:

"Mū, mū tāva dāls,

Mū, mū pasakuora,

Mū, mū zeida dīgūs

Mū, mū lozdys kryumā."

Padzyna jī tū vērsi. Atguoja vucys i suoka bļaut:

"Bē, bē tāva dāls,

Bē, bē pasakuora,

Bē, bē zeida dīgūs

Bē, bē lozdys kryumā."

Vysleidz tāvs vucynam naticēja un padzyna jū. Atguoja cyuka i suoka krekstēt:

"Ē, ē tāva dāls,

Ē, ē pasakuora

Ē, ē zeida dīgūs

Ē, ē lozdys kryumā."

Aizguoja tūreiz tāvs ar muoti da tai vītai, kur dāls ganēja gūvs, i īsavēre lozdys kryumā dālu. Jis beja pasakuorīs. Nūžālova, nūbādova tāvs ar muoti, bet nabeja kū dareit.