Dažādi laimes zvēri.

4. V. Zacharska no Zeigurova, Viļānu pag.

Vacūs laikūs dzeivuoja šai pasaulē vīna vaca atraitne, tai atraitnei beja vīna vīnīga meita. Jī leja tyk nabogi, ka nebeja kū ēst, ni kur puorgulēt nakti. Un atraitne beja vēl okla: nikuo nanedzēja. Jai nabeja nikaida monta, tikai vīna zūss, kura vaduoja vacū atraitni. Kad atraitne guoja uz baznīcu, zūss jū pavadēja, a pati gaidēja jū, kod jei izīs nu bazneicys, un pavadēja jū atpakaļ uz sātu.
Vīnu reizi īraudzēja baznīckungs itū oklū atraitni baznīcā vīnu pošu. Cytā dīnā jis atīt uz tū ustabu, kur dzeivuoja atraitne, bet okluos jis naatroda sātā, a pavaicuoja meitai, kur juos muote. Meita atbildēja baznīckungam, ka muote nūguoja nu reita uz baznīcu un vēl naatguoja uz sātu. Baznīckungs vaicoj meitai, kai jei jū oklu laiž staiguot vīnu pati. Meita atblidēja: "Na, baznīckungs, jei vīna pati naīt, jū pavadej zūss, kura mums gudruoka kai cylvāks."
Baznīckungs nūsabreinuoja, ka zūss vadoj oklu atraitni, un pagaidēja, koleidz jei atīs. Kad atguoja atraitne, baznīckungs vysu redzēja un pēčuok pasacēja atraitnei: "Puordūd man itū zūsi, es tev lobi aizmoksuošu un uzturēšu tevi da pošai nuovei."
Atraitne atdevja baznīckungam gudrū zūsi un baznīckungs turēja atraitni da pošai nuovei. Kad atraitne nūmyra, tū pašu dīnu nūmyra ari tei gudruo zūss. Tai baznīckungs vēl tagad pīmin tū zūsi, un skaita jū par svātu engeļi, kurs beja puortaisējīs par zūsi.