11. A. 1030. V. Z a c h a r s k a n o 100 g. v e c ā M. S u š a M a k a š ā n u p.

Vīnu reizi dzeivuoja pasaulī vīns zemnīks, jis struoduoja uz sovys zemis, un nu tuo dorba dzeivuoja. Zemnīkam beja lela saimja un nu mozys daļis zemis jam dzeivuot beja griuts.

Vīnu reizi zemnīks izguoja uz teiruma un veras pi meža molys, kur vareitu vairuok izstruoduot zemi. Taišņi tymā laikā atskrīn valns un vaicoj zemnīkam, kū jis veras un kū jis grib taiseit. Zemnīks suoka stuosteit valnam: "Mun ir lela saimja un nu ituos zemis navar nikai puordzeivuot, un tagan gribu pi meža molys iztaiseit aramu zemi un paseit rudzu."

Valns soka zemnīkam : "Ka tu man īdūsi pusi tūs izaugušūs rudzu, es tev paleidzeišu itū zemi apstruoduot."

Zemnīks beja gudrs un pascēja valnam: "Labi! tu man paleidzeisi apstruoduot zemi, es tev pusi rudzu atdūšu."

Suoka valns struoduot, par pus dīnys apstruoduoja daudz zemis un pīsēja rudzus, rudzi izauga cīši lobi. Atguoja rudins, vajag rudzus pļaut, atīt arī valns pi zemnīka un vaicoj : "Nu, zemnīks, vajag rudzus pļaut."

"Jā!" atbildēja zemnīks.

Suoka valns otkon struoduot, par pus dīnys vysi rudzi beja nūpļauti un nūvaduoti. Valns vaicoj zemnīkam: "Kod daleisim itūs rudzus?"

Zemnīks jam atbilda: "Atej da manis par nedēļi, tūlaik daleisim itūs rudzus uz pusis."

"Labi!" pasacēia valns un nūguoja.

Zemnīks par tū laiku izkūla vysus rudzus un pībēra maisus, bet salmus pametja. Par nedēļi atīt valns un vaicoj zemnīkam: "Nu, zemnīks daleisim tūs rudzus."

Jā!" atbildēja zemnīks, nūvedja valnu. un izdalīja salmus. "

Valns pajēma tūs salmus un gribādams kult maizei, kratēja, kratēja - nikuo nav. Sazadusmuojās valns, atskrīn pi zemnīka un vaicoj: "Kas tja ir par taidu naiaimi: nav nivīna griuda rudzu?"

Zemnīks paruodēja valnam sovus salmus, ka jam ar nav. Valns nu raizis palyka dusmeigs, bet golu golā palyka otkon mīreigs, ka zemnīkam ar taidi pat rudzi. Ūtrā godā valns vairuok naguoja pi zemnīka struoduot un sēt rudzus, dūmuodams, ka nikas naizaugs. Bet zemnīks vēļ tagad ād tūs rudzus, kurus pīkūla nu valna apstruoduotuos zemis.