Zagļi ar nabagu.

1. A. 1526. V1. Pilipjonoks, Asūnē.

Senejūs laikūs dzeivova pi vīna kunga treis bruoļi. Vīnu dīnu kungs uz jīm sasasirdējuos un aizdzyna nu sovys sātys. Bruoļi tagad palyka sirdeigi uz kunga un dūmuoja, kai jam atmoksuot par itū ar ļaunu. Reizi bruoļi saguoja slovā storpā un sarunova īt zam vīna tylta, kur kungs brauks ar gaspažu. Vot jī divejūs palyka sjādāt zam tylta, a trešajam īt kryumūs un muoneit kungu sokūt: "Brīdis, Brīdis!"

Par nagaru laiku kungs brauc ar trejim zyrgim vīnā karapaškā (karītē) un ar gaspažu. Kad kungs beja jau kluot kryumym, tad trešais bruolis i suoc runuot: "Brīdis. brīdis."

Kungs dūmova, kas tys asūt par zvēru. Jys pametja zyrgus un guoja obi ar gaspažu vjārtūs, kas tys par zvāru, nu kura cylvāks breinīs un runoj pots ar sevi. Cikom kungs ar gaspažu beja kryumūs, tikom itī divi bruoļi, kuri sjādjāja zam tylta, sāduos karapaškā un nūbraucja. Bet trešyis bruolis, kurs īvjadja kungu ar gaspažu dziļi kryumūs, pots aizskrāja bruoļim prīškā. Tagad sasāda visi treis bruoļi karapaškā un braucja, cik tik var. Bet kungs ar gaspažu palyka staiguodami kryumūs. Bruoļi brauc un danuoc vīnu vacu, siermu lynu kuļsteituoju un soka : "Sēdīs, dzjadzka un byuņ par myusu kungu."

Kuļsteituojs apsasādās pi bruoļim un soka: "Bārny, as jau asmu pavysam nabogs un ar veizem. Kur lai byunu par kungu, vjāj jyus?"

Bet bruoļi soka: "Vjaļc i tū paļtu, kuŗu i kungs vylka un pamjatja karapaškā, un tevi ari navaicuos nikas, un dūmuos vysi, ka kungs."

Braukaļādami bruoļi kučeru izvuicēja pa poļski runuot vīnu vordu: "dobža" (labi). Vot jī braucja visi četry, cikom nūbraucja pi vīna goroda, kur beja dŗābu magazins. Īvaduši kuļsteituoju magazinā, vjāļ jū bruoļi pavuicēja, lai kū jī ruodeis, bet jys lai tik soka: "Dobža".

Veikalā tierguotuojs atņasja krāslu kuļsteituojam, dūmuodams, ka pūļu kungs. Tja bruoļi pīnas vysaidas dŗābis un ruoda kungam, bet jys tik atsoka: "Dobža".

"Tai ruodeidami sovam kungam drābis, jī pīlyka trejūs pylnu vazumu un aizbraucja, tik pamjatja sovu kungu un pascīje tierguotuojam, ka itys kungs vysu aizmoksuos, a jī tik dŗābis aizvjass, atbrauks kungam pakaļ. Tai trejūs bruoļi sāduos un braucja uz sovu pusi i nadūmova kuļsteituojam braukt pakaļ. Tierguotuojs saskaitēja, cik kungam vajag moksuot, un gaidēja, kod jam kungs moksuos. Bet kuļsteituojs tik pagrūzuos kunga paļtā un sjād. Zam vokora tierguotuojs soka, lai moksuojūt par dŗābjom. Bet jys tikai soka: "Dobža".

Tai tierguotuojs ar kungu naticis golā i radz, ka nikas naizīs, aizguoja saukt poļiciju. Atnuocja poļicija un vaicuoja nu kunga dokumentus, nūvylka paļtu un breinovās poši, ka itam kungam veizis kuojuos. Tod jys izstuostēja, kai jū pīkruopja treis bruoļi, un pīsazyna, ka jvs asūt lynu kuļsteituojs. Tod poļicija atlaidja jū, bet tierguotuojs palyka bez naudys.