3. A. 1650. L. Uļjaņa no A. Dakules, Latgalē.

Reizi dzeivuoja treis bruoļi. Tāvs mierdams sovam vacuokajam dālom duovynuoja laišku, syduškejam kači un jaunuokajam lyukus. Tāvs nūmyra un dālim cyts nikas napalyka, kai laiška, kačs un lyuki. Viņi laidjās kotrs ar sovu duovonu pasaulē laimes maklātu. Guoja, guoja vacuokals un īguoja kulā, kur kunga maizi vētēja kolps ar sauvu. Paruodēja kolpam sovu lītu. Kolps aizguoja, pastuostēja kungam, ka ir nazkaids ceļa guojējs atnesis lobu mašīnu, ar kuru varēs dreizi struoduot. Kungs prasēja ceļa guojēja: "Cik tu gribi par šū lītu?"

Laimes maklātuojs sacēja: "Treis pyuri zalta."

Tod kungs pībēŗa jam treis pyuri zalta un vacuokais bruoļs atguoja uz muojom boguots.

Tagad guoja laimes maklātu vvduškais. Pajēmja sovu duovonu un ļaidjās ceļā. Guoja, guoja - īguoja vīna kēniņa pilī. Tur beja pībraukuši kēniņam daudzi vīru, bet peļu kēniņa pilī beja tik daudzi, ka peles ēde reizē ar kēniņa vīsim. Kai tik īguoja vyduškais bruoļs ar kaču rūkās, vysas peles nūskrēja un nūsaglobuoja zemē oluos. Nyu kēniņa pilī nabeja redzama ni vīna pele. Tagad kēniņš lyudzja, lai puordūd jam šū zvērīti. Laimes maklātuojs puordevja par treis pyuri zalta. Kēniņš sabēŗa trejus pyurus zalta un vyduškais bruoļs atguoja uz muojom boguots. Tagad laidjās pats jaunuokais ar lyukim. Aizguoja uz azaru un plyukuoja lyukus, azara molā nūsasēdīs. Daguoja valns un sacēja: "Kū tu dareisi ar lyukim?

Jaunuokais bruoļs atsacēja: "Plēšu taidas syksnas, ar kurom varēs savilkt azaru kūpā."

Valns nūsabeida, tuopēc ka tad jam nabyus kur dzeivuot: ni pašam valnam, ni juo bārnim. Valns sacēja: "Cik tu pajemsi par tū, ka navilksi azara kūpā.

Laimes maklātuojs sacēja: "Pylnu munu capuri zalta."

Valns labpruot beja ar mīru un nūguoja atnezja maisu zalta. Pa tū laiku laimes maklātuojs īlyka capuri dūbē un puorgrīzja dybynā caurumu. Valns bēŗa, bēŗa zaltu, capure kai pylna nabeja tai nabeja. Valns aizskrēja atnezja vēļ vīnu maisu, tad beja pīpīļdīta dūbe un arī capure pvlna ar zaltu. Jaunuokais bruoļs pajēmja zaltu un atguoja uz muojom. Tagad vysi treis bruoļi palyka boguoti ar tāva duovonom.