4. A. 1739. A. Gari - Juone no 40 g. vecās M. Dortholtes, Dricēnos. Latvju kultūras kr.

Dzeivuoja reizi vīns stypri boguots muižinīks. Gadējuos, ka tys muižiniks saslyma. Pasauc jis ārstu, lai apsaver, kas jam par slimību. Atguoja ārsts, apsavēŗa nu vysom pusēm un par reizi napasacīja, kaida jam slimība, tikai pasacīja, lai reit nu reita nūsyuta ar sulaini butelē sovus meizolus.

"Lobi!" pasacīja muižinīks un gaidīja reitdīnas.

Reitā muižinīks padarīja, kai ārsts beja pīsacējis, sulains nas buteli ārstam. Par nalaimi jam tei butele izkreit nu rūkom un vyss šķeistums izzalej. Nazyna rivu sulains, kū darīt, kū na. Kungs beja bezgola borgs, atīt atpakaļ un pasacīt, ka izzalēja, sulainis baidījās. Īt jis pa ceļu dūmuodams, te ceļa molā goni ganīja gūvis. Vīna guvs raun meizt, jis pagryuž buteli un tei pīskrīn pylna. Tagad sulains īt drūši pi ārsta ar pylnu buteli. Ārsts apsaver šķeistumu un pīroksta muižas kungam: "Tev atsaras teļš."

Tū izlasījis, muižas kungs nazynuoja nu kauna un bādas, kur leist. Tyulin jis atstuoja muižu un laidjās ceļā, cykam jam puorīs tei reize. Jis ilgi guoja un nūplēsja zuobokus, redz: guļ uz pļovas vīns nadzeivs karaveirs. Jis daīt kluotu, grib tam nūmaukt zuobokus, bet navar; kuojas sabrīdušas. Tad jis pajem atgrīž kuojas leidz ceļim, pasyt tuos padusē un īt. Pa timsi jis pīguoja pi vīnas ustobiņas un pasaprasīja uz nakts muojom. Te jū īlaidja uz cepļa puorgulēt. Ceplis beja sylts un jis dreiži aizmyga. Tamā naktī saiminīkim atsavedja gūvs un telīti tī atnesja uz ustobu, nūlyka pi cepļa uz cysom. Teliņš atspierdzis, suoka bļaut. Atsamūda uz cepļa muižas kungs un dūmoj : "Tys ir muns teliņš, labi ka jis jau atsaroda. Atstuošu jū saiminīkim un pats bēgšu prūjom."

Nakti jis klusiņom nūruopuoja nu cepļa un aizbāga. Nyu jis drūši guoja uz sovu muižu atpakaļ. Reitā saiminīki pīsacāluši verās; uz cepļa nava gosta, dūmoj, kur jis nyu ir palicis, un atrūn uz cepļa tikai kuojas. Sasauc sābrus un vysi nūsprīž, ka teļš ir cylvāku āduojs, apēdja par nakti cylvāku un ir palykušas tikai kuojas. Teļu - ragani izvad uz pogolma un ar vuoļam nūsyt.