18. V. Filšs no J. Viškera Kaunatu pag.

Vīnu reizi dzeivuoja uz šuos zemis Valns un Dīvs. Valns struoduoja zemi, turēja lūpus, un tai pat Dīvs ar struoduoja un turēja lūpus. Pi Valna dzeivuoja gons, kurijis dzonuoja lūpus. Valna lūpi beja gūvis, bet na taidas, kai Dīva gūvis, ar taidom kuojom kai pi zyrga. Vīnu reizi gons naredzēja, kai Valna gūvis īleida Dīva rudzūs. Dīvs jūs sagiva un puortaisēja par taidim, kai juo gūvis. Sazatvēra gons, ka nav gūvu, suoka jis meklēt, bet nikai navarēja atrast. Atskrēja Valns - verās: nav lūpu -suoka sist gonu un vaicuot, kur jis lyka jūs. Gons rauduoja, bet nikai navarēja pasceit, kur propula gūvis. Valns labi pasyta savu gonu un padzyna jū uz alni struoduot pi korstu kotlu, kur vuorej ēst dēļ vysys alnis; a pats nūguoja pavaicuot nu Dīvu, kur juo gūvis. Dīvs pascēja Valnam īt pazavārtus: «Atrassi sovys gūvis, vari pajimt.» Valns īguoja Dīva klāvā - verās: nav juo gūvu: vysi puortaiseity, jis jūs navar pazeist. Jis nūguoja pi Dīva un prosa, kai jam tagan dzeivuot. Dīvs jam atbildēja: «Struoduot zemi un sjāt labeibu!» Valns soka, ka jam nav sāklu, ar kū apsēt zemi. Dīvs jam īdevja auzus. Valns pajāmja tūs auzus, skrīn uz sovu sātu un runoj, kab jam naaizmierst, kai saukt sāklus, jis vys runoj: «auzys - auzys». Pa ceļi ar Valnu sazatopa Dīva engels un vaicoj, kū jis nas. Valns jam ātbilda, ka jis nas auzus, jam īdevja pats Dīvs. Engeļem tyka žāl auzus, ka Valnam taidus lobus sāklus Dīvs īdevja. Engels dreižuok nūskrēja pi Dīva un vaicoj, par kū Dīvs Valnam īdevja dēļ sāklu lobus auzus; bet Dīvs atbildēja, ka jis nazynuoja, kū lai īdūt. Engeļs soka uz Dīvu; ka jis atņims nu Valna auzus, a īdūs jam usnis sāklus. «Nu kai gribi, tai dori!» pascēja Dīvs. Engels dreižuok nūskrēja dadzeit Valnu. Taišņi pi pošys sātys engeļs dadzyna Valnu un runoj, ka Dīvs jam puormeja sāklus nu auzu uz usnis. Valns pajāmja usnis un pasēja, usnis izauga lobys, un Valns navarēja jūs nupļaut. Valnu sagiva vīns zemnīks un pasadynuoja maisā un aizsēja ar lelu viervi, kur Valns puorsēdēja kaidus treis godi, a juo usnis tai pīauga, ka jūs pa vysu pasauli tagan gan ir, jūsļauds par Valna usnim sauc.